Moet nie vergeet van môre

26 Februarie 2005 - Die Burger
Johan du Toit

Die Ombudsman vir Bankedienste het sy kommer uitgespreek oor die toename in klagtes oor verbandlenings die afgelope jaar.

Adv. Neville Melville sê in Januarie vanjaar het die klagtes oor huislenings 24% van alle klagtes uitgemaak wat sy kantoor ontvang het teenoor 18% vir klagtes oor kitsbanke - wat gewoonlik die meeste klagtes ontlok.
Melville verwag klagtes oor huisverbande kan dalk nog verder die jaar toeneem vanweë die lewendige eiendomsmark. "Geld kan nou baie goedkoop geleen word en mense vergeet van môre." Hy voorspel dat die Ombudsman binne 'n jaar of twee met klagtes to doen gaan kry oor banke wat meer geld aan kliënte geleen het as wat hulle in staat is om terug to betaal; en dat banke se eiendomswaardeerders die moontlike afswaai in die mark onderskat het toe hulle die eiendom waardeer het. Banke kan dalk ook huislenings opskort op tweede eiendoms omdat kopers nie in staat is om dit uit te verhuur nie weens 'n oormaat huureiendom in die mark.

Melville het ook gesê hy gee nie voor om 'n deskundige op die eiendomsmark te wees nie, maar sy kantoor het verskeie mark ineenstortings die afgelope vyf jaar sien gebeur.

In 2000 het die Ombudsman talle klagtes van mense ontvang oor effektetrustbeleggings wat nie hulle hoë opbrengs kon behou nie. Ander markopskuddings was die ineenstorting van die IT-bedryf en 'n jaar daarna die September 11-gebeure wat aandelemarkte sleg getref het.

Melville sê hoewel die Ombudsman die meeste van die klagtes oplos ten gunste van klaers, kan die banke nie altyd blameer word nie. Daar is kliënte wat te laat op die wa spring (soos met eiendomsbeleggings), hulle in die skuld dompel en dan vingers verbrand.

Melville sê enigiemand wat groot skuld maak behoort inligting en ander bronne soos onafhanklike financiële beplanners behalwe banke te raadpleeg. "Hulle moet nie vergeet nie, banke is in die eerste plek daar om geld te maak."